Paroisses
 

Finanzéierung

Wéi ginn eis Kierche finanzéiert?

Vill Leit mengen, datt d’Kierche räich snn. Mä esou einfach ass dat guer net. Am Contraire, déi eng oder aner Kierchefabréck ass vläicht räich, mä déi grouss Majoritéit vun de Kierchefabrécke muss kucken, datt se mat hire bescheidene Mëttelen iwwer d’Ronne kommen. D’Kierchefabrécke kennen och net op Ënnerstëtzung vum Bistum oder vum Staat zielen.

D’Kierchefabrécke duerfe keng Subside vun de Gemengen kréien, mä sollen alles dru setze fir sech selwer ze finanzéieren. Zu den Einnahme vun enger Kierchefabréck zielen:

  • d’Zënsen op de Spuerbicher;
  • d’Pacht op de Felder;
  • eng Intentioun pro Mass;
  • d’Subsiden;
  • d’Donen an
  • d’Afferen.

Aus dëser Opzielung geet kloer ervir, datt den Affer fir d’Kierchefabrécken immens wichteg ass. Den Affer ass net fir de Paschtouer säi Portemonni bestëmmt, mä de Bénéficiaire ass ëmmer um Parbréif annoncéiert oder gëtt während der Mass ugekënnegt:

  • vum Bistum virgeschriwwen Afferen (z.B. Bridderlech Deelen, Kannermissiounswierk, Leprahëllef),
  • fir pastoral Aufgabe vun der Par (d.h. Parbréif, Sekretariat, Kanner- a Jugendaarbecht etc.),
  • fir d’Kierchen, d.h. fir d’Kierchefabrécken.

D’Kierchefabréck muss d’Fonctionnements- an Investitiounskäschte vun de Kierchen iwwerhuelen, ënnert anerem:

  • alles wat fir eng Mass, eng Andacht, eng Vesper néideg ass (Hostien, Masswäin, Käerzen, Kierchewäsch, Massendéngerkleeder, Kielech, …);
  • d’Peien an d’Sozialbeiträg fir d’Personal (z.B. Botzfra);
  • d’Blummen a soss Dekoratioun;
  • den Entretien an d’Stëmme vun der Uergel;
  • den Entretien vun de Klacken;
  • d’Assurancë vun de Kierchemiwwelen an d’Haftpflicht.
    Donieft ass d’Kierchefabréck och fir den Entretien, d’Verschéinerung, Reparatiouns- a Restauratiounsaarbechten an der Kierch zoustänneg (z.B. Altär, Bänken, Schief, etc.).

D’Kierchefabrécke kënnen net eleng maachen, wat se wëllen, mä ënnerleien enger Kontroll duerch de Kierchefong.

Wéi kennt Dir eng Kierchefabréck finanziell ënnerstëtzen? Do ginn et e puer Méiglechkeeten:

  • Ariichte vun enger Stëftung;
  • Ären Affer an enger Mass;
  • den Don fir d’Kierchefabréck, z.B. wann e léiwe Familljemember stierft;
  • d’Ierfschaften.

Zu Ärer Informatioun fannt Dir an der Rubrik “Konten” d’Kontosnummere vun de Kierchefabrécken aus eiser Par. D’Kierchefabrécke soen Iech elo schonns merci fir all finanziell Ënnerstëtzung.

Quell: Carlo Mulbach, Parbréif fir de Parverband “St. Willibrord” Helpert, Nr. 4/11 - Jg. 7

 
Service Kommunikatioun a Press
Äerzbistum Lëtzebuerg

© Verschidde Rechter reservéiert
Dateschutz
5 avenue Marie-Thérèse
Gebei H, 1. Stack
L-2132 Lëtzebuerg
+352 44 74 34 01
com cathol.lu