Liens . Links
 

Jugendpastoral
Pastorale des jeunes

Gedanken fir di Jonk

P.S. Di Aner däerfen awer och liesen an äentwerten.

Adam an Eva? Gleeft Dir dann un esou Geschichten?

Dat war d’Bemierkung vun enger Schülerin op Première, wéi mer di biblesch Texter an der Klass gelies hunn. Aus den Naturwëssenschaften wësse mer datt de mënschleche Kierper aus der Evolutioun vun de Liewewiesen ervirgaangen ass. An d’Ethologie, also Verhalens-fuerschung, léiert eis och, datt mir, Mënschen an d’Déieren, änlech Verhalensweisen hunn.

Awer wéi ass et mam Geescht? Als Mënsche kënnen mir Bezéiungen mat Déieren ophuelen, mir kënnen eis un si bannen, an si un eis. Jiddereen, deen en Hausdéier huet, weess dat. Awer mat hinnen schwätzen a Gedanken austauschen, op déi si eis äntweren, kënne mer net.

Zënter Mënschegedenken gëtt versicht, mat den Déieren ze schwätzen, an et ass och de Fuerscher gelongen, verschiddenen Afen Vokabelen an Sätz vun eiser Sprooch bäizebréngen. Awer no enger éischter Begeeschterung musse mer enttäuscht feststellen: wann d’Déieren eis Sprooch erléieren, dann huet dat éischter mat Dressur vum Verhalen ze dinn, wéi mat wierklechem Verstoen. Gedanke-Welten opbauen an si duerch d’Sprooch vermëttelen, dat kënne mer mat den Déieren net. Denke mer u mathematesch a wëssenschaftlech Theorien, u Gedichter a Geschichten. Och wa mer den Androck hunn, d’Kaz oder den Hond géif eis andächteg nolauschteren, zu engem sënnvollen Austausch mat hinnen iwwert eis Theorien kënnt et net.

Si mir Mënschen den Déieren och duerch d’biologesch an psychesch Evolutioun iergendwéi no, um Niveau vum Geescht si mer meilewäit vun hinnen ewech. Et gëtt Theorien, di de mënschleche Geescht als Produkt vun engem Kierperdeel wëlle verstoen, vum Gehier zum Beispill oder vum Nervesystem. Anerer wëlle de mënschleche Geescht duerch psychesch Verhalensmuster erklären. Mee all dës Theorien dinn sech schwéier, mënschleche Geescht och bei den Déieren ze fannen.

De mënschleche Geescht ass éischter eppes ganz Neies an der Natur, dat mer net op de Kierper an och net op d’Verhalen kënne reduzéieren. De Mënsch ass net säi Kierper, säi Gehier, an hien ass och net seng Psyche. Dat ass eng Wourecht, déi mer schonn an den ale reliéisen a philosopheschen Texter fannen, an eben och an der Geschicht vun Adam an Eva.

Dës Geschicht rifft eis bildlech d’Wou-recht iwwert de Mënsch an Erënnerung: Obschons de Kierper an d’Verhalen vum Mënsch munches mat den Déieren gemeinsam hunn - allebéid sinn si aus dem Buedem geformt -, ass de Mënsch dach grondlegend aneschters wéi d’Déier. D’Bibel dréckt dat esou aus: « Gott erschuf den Menschen als sein Bild, als Bild Gottes erschuf er ihn » oder nach: « Da formte Gott der Herr den Menschen, Staub vom Erden-boden, und blies in seine Nase den Lebensatem ». Vis-à-vis vun den Déieren gëtt de Mënsch sech dann och dësem Ënnerscheed bewoosst: « Der Mensch gab Namen allem Vieh, den Vögeln des Himmels und allen Tieren des Feldes. Aber eine Hilfe, die dem Menschen ebenbürtig war, fand er nicht. » (Gen 2,20). Eréischt, wou de Mënsch en anere Mënsch begéint, huet hien Ebenbürtiges niewent sech: « Das ist Bein von meinem Bein, und Fleisch von meinem Fleisch » (Gen 2,23), seet de Mann wéi hien d’Fra begéint.

Dës Texter um Ufank vun der Bibel gehéieren zu deenen gréissten Texter, déi an der Mënschheetsgeschicht geschriwwen goufen. D’Annik de Souzenelle, Psychanalystin a grouss Spezialistin vun de Bibeltexter, huet e Kommentar vun 1460 Säiten iwwert di dräi éischt Säiten vun der Bibel geschriwwen, wou si dee ganze mënschleche Wëssensräichtum, deen an deenen puer Säiten stécht, ausdrécklech zougängeg mëscht.

Adam an Eva, gleeft Dir un esou Geschichten? hat d’Schülerin op der Première gefrot. Meng Géigefro ass: Hues du deen déiwe Sënn vun dëse Geschichte scho beduecht? Iwwer 2500 Joer setzen sech d’Mënschen mat dësen Bibeltexter ausenaner. A wéi di rezent Wëssenschaft eis et weist, si mer nach wäit dovun ewech hire ganzen Räichtum ze erfaassen.

P. Jean-Jacques Flammang scj


Zweet Fro: Wat fir Gedanken kommen Iech op, wann Dir di zwee éischt Kapitelen aus der Bibel liest?
Är Bemierkungen, Gedanken a Froen kënnt Dir op jjf scj.lu schécken.


Pour joindre l’équipe pastorale des jeunes de l’archidiocèse de Luxembourg:

https://www.facebook.com/cathollu

https://www.instagram.com/cathollu

Archevêché de Luxembourg

4, rue génistre L- 1623 Luxembourg

Luxyouth cathol.lu

 
Service Kommunikatioun a Press . Service Communication et Presse
Äerzbistum Lëtzebuerg . Archevêché de Luxembourg

© Verschidde Rechter reservéiert . Certains droits réservés
Dateschutz . Protection des données
Ëmweltschutz . Protection de l'environnement