lb fr

Kannerkatechees a Familljemassen

Léiw Elteren, léif Kanner,
Wéi déi meescht vun iech wëssen, ass ët fir eis kathoulesch Kierch hei zu
Lëtzebuerg eng Zäit vun de groussen Ännerungen. Eng vun deenen Ännerunge
betrëfft d’Glawensvermëttlung bei de Kanner. Ab dem September 2017 gëtt ët
an der Grondschoul kee Reliounsunterrecht méi. Hei ass e groussen Deel vun der
kathoulescher Glawensvermëttlung geschitt. Och d’Preparatioun op
d’Eischtkommioun ass zu engem groussen Deel bis elo an de Reliounscoursen an
der Schoul gemaach ginn. D’Eischtkommioun ass dat grousst Glawensfest fir eis
Grondschoulkanner, wou si fir d’éischt an hirem Alter selbstänneg dierfe JO zu
Gott soen. Fir dass si dëse JO awer weiderhi kënnen, sou gutt preparéiert wéi bis
elo agoen, an dass si hire Wee mat an zu Gott kennen a goe kënnen, si mir als
Elteren an Erwuessener aus der Par erëm méi gefuerdert. Vun der Kierch aus
gëtt dës Weebegleedung a Glawenserzéiung an der Kannerkatechees proposéiert.

Hei e puer Informatiounen, wéi d’Kannerkatechees an eiser Par « Mess-Réibierg
Sainte Famille » organiséiert ass.

Mir schaffen a verschiddenen Altersgruppen :
• D’Butzenkatechees (0-3 Joer) zesummen mat den Erwuessen
• D’Midikatechees Cycle 1 & Cycle 2 (4 – 7 Joer) zesummen mat den Erwuessen
• D’Maxikatechees Cycle3 & Cycle4 (7 – 12 Joer) zesummen mat den Erwuessen
• D’Jonk Teens (12 - 14 Joer)
• D’Jugendbegleedung ( vun 15. Joer un)
• Déi Erwuessen

Mir hunn 2 Aktivitéiten :
• D’Familljemass
• D’Katechees

Am Rhythmus vun 2 Woche fënnt ëmmer eng Familljemass statt. Während der
Familljenmass kënnen all d’Kanner no der Begréissung bis d’Wandlung mat e puer
Elteren an den Home goen. Hei kréien si d’Evangelium vum Dag kandgerecht mat
enger Geschicht, engem Rollespill, … gezielt. Vun der Wandlung un si mir dann erëm
mat an der Kierch.
Uschléissend un d’Familljenmass ass d’Kannerkatechees. Hei trefft sech
ofwiesselnd déi verschidde Gruppe vu Kanner mat hiren Eltere fir
während +/- 1,5 Stonn d’Thema vum Dag ze verdéiwen.
D’Kanner maache Spiller, Bastelereien, Lidder a Gespréichsronnen zum Thema a
setzen sech op hier altersgerecht Aart & Weis mat hirem Glawen auserneen.
D’Eltere maachen zu der selwechter Zäit eng geleete Gespréichsronn iwwert dat
selwecht Thema, dass och mir als Erwuessener eise Glawe verdéiwen an eis
Kanner op hirem Wee gemeinsam ënnerstëtze kënnen.

Interessant Froen :
Wéi geet dat mat der Eischtkommioun ?
Ab dem September 2017 kënnen d’Kanner d’Preparatiounsjoer fir d’Kommioun no 2 Joer
Participatioun an der Kannerkatechees ufänken. D’Eltere mellen hiert Kand am Ufank vum
Schouljoer beim Paschtouer un. An der Iwwergangsphase zielen d’Reliounsjoeren an der
Schoul. Viraussetzung fir d’Kommioun ze maachen ass Deelhuelen un de
Kommiounsvirbereedungsaktivitéiten zousätzlech zu der Kannerkatechees. Eng
Versammlung fir méi Detailer zu der Kommioun an der Kateches ass am Ufank vun all Schouljor. Détailer ginn am Parblat matgedeelt.

Mussen d’Eltere mat an d’Kannerkatechees ?
D’Präsenz vun den Elteren an der Kannerkatechees ass häerzlechst recommandéiert.
1. Dëst ass e flotte Glawensmoment deen an der Famill zesummen erlieft gëtt.
Verschidden Aktivitéiten, Lidder, Spiller, Bastelsaachen,… ginn zesumme gemaach.
2. Setzen d’Elteren sech an de Gespréichsronne selwer mat hirem Glawen auserneen.
Wat heescht fir mech gleewen ? Wat vermëttelen ech mengem Kand gär beim Glawen
un den Härgott ?
3. D’Eltere kënnen de Kanner hier Glawensfroen am Kontext mat der Kannerkatechees
mat opfänken a beäntwerten. Wa mer bedenken, dass 2 Reliounsstonnen d’Woch duerch
1 Aktivitéit 1 Mol am Mount ersat ginn, musse mer eis bewosst ginn, dass vill Froen, déi
d’Kanner soss dem Reliounsjoenseignant stelle konnten, am Raum hänke bleiwen. Hei sinn
d’Elteren natierlech gefuerdert, fir hir Kanner elo méi aktiv mat ze begleeden.

Wéi kënne mir dëst als Famill erliewen, wann eis Kanner verschidden Alteren
hunn ?
Dëst ass guer kee Problem, mir sinn hei flexibel an dir kënnt iech eraussichen, wat fir
Iech méi passend ass, ob dir méi jonk Kanner mat bei de « Grousse Grupp » huelt, oder
ëmgedréint. Dat eenzegt, wat dir bedenke musst, d’Kanner vum Kommiounsgrupp
mussen am Grupp vun deenen « Groussen » deelhuelen.

Wéi eng Sprooch gëtt an der Kannerkatechees geschwat ?
Am Grupp mat de Kanner gëtt gréisstendeels Lëtzebuergesch geschwat. Dëst kann
awer dem Besoin no och méisproocheg sinn.
Den Elteregrupp wäert gréisstendeels op Lëtzebuergesch a Franséisch sinn, ausser de
Besoin an d’Kompetenz fir eng aner Sprooch besteet och nach.

Kann ech aktiv hëllefen ?
Natierlech si mir ëmmer frou fir all Hëllef ! Wien interesséiert ass schonns am Virfeld
matzeschaffen dierf sech gär bei der Pastoralassisstentin oder der Katechetin titulaire mellen.

N.B. :
D’Datumer vun de Familljemassen an der Kannerkatechees fann dir ëmmer
am aktuelle Parblat, sou wéi op de Plakater, déi an de Kierchen aushänken.
Wann dir d’Parblat per E-Mail wëllt geschéckt kréie mellt Iech iwwert mess-reibierg cathol.lu

 
Service Kommunikatioun a Press . Service Communication et Presse
Äerzbistum Lëtzebuerg . Archevêché de Luxembourg

© Verschidde Rechter reservéiert . Certains droits réservés
Dateschutz . Protection des données
Ëmweltschutz . Protection de l'environnement