Bëschofswuert fir d’éischterlech Bousszäit 2015


Home GoBack Print Kontakt Lëscht

Bëschofswuert fir d’éischterlech Bousszäit 2015

Léif Schwësteren,

Léif Bridder,

erlaabt mer um Ufank vun dëser Faaschtenzäit dëse Bréif un Iech ze riichten. Mir sinn ënnerwee op Ouschteren zou, d’Fest vun der Operstehung vu Jesus Christus.

A

n der Mass, a besonnesch op Ouschteren, erneiert Christus seng Kierch, eis Kierch, duerch säi Läif a Blutt an duerch den Hellege Geescht. Ouschteren ass duerfir ëmmer en neien Depart.

Mir maachen dat als Kierch och an engem neie Kontext. Déi Leit, déi vun elo un vun der Kierch ugestallt ginn, ginn net méi vum Staat bezuelt. Elo musse mir all duerfir suergen, dass och an d’Zukunft nach kënne Leit sech haaptamtlech fir d’Kierch engagéieren.

O

ch de Reliounsunterrecht wäert an Zukunft ewech falen. Do musse mir dann d’Kateches an de Poren opbauen, eng Kateches déi äis hëlleft fir Kanner a Jugendlech an de Mysterium vu Christus anzeféieren.

Eng aner Tâche ass, datt mir selwer fir äis Kierchegebeier an hiren Ënnerhalt opkomme mussen.

Dat si grondleeën Verännerungen. Mir sin domat opgeruff, äis als Kierch nei opzestellen fir dem Optrag vu Christus gerecht ze ginn, fir d’Evangelium ze verkënnegen.

D

’Faaschtenzäit ass eng Period, wou mer opgeruff sin, op de Konsum ze verzichten, fir méi fräi ze ginn fir d’Begéignung mat dem Herrgott an de Mënschen. Mee eis Manéier, wéi mer d’Chrëschtentum gelieft hunn, huet och eppes mat Konsum ze dinn. Mir hu vergiess, datt d’Kierch net méi nëmme de Bëschof an d’Paschtéier sinn, mee datt mir alleguer dozou gehéieren.

Jidderee vun äis dréit Matverantwortung fir dës Kierch, jidderee vun äis ass en Deel vun dem Vollek Gottes, dat ëmmer ënnerwee ass. Dës Kierch brauch elo e bëssen méi Suen, si brauch awer och vill Benevolat, vill méi Hänn déi mat upaken.

Eis Kierch gëtt an de Medien vill ugegraff. Gerecht Kritik mëscht sech do mat munneche Parolen, déi Ignoranz, Intoleranz an esouguer heiansdo Haass ausdrécken.

M

ee dat ass et nach ëmmer an der Kierchegeschicht ginn, esouguer an eisem klenge Lëtzebuerg. Wat awer vill méi schlëmm ass wéi déi Attacke vu baussen, dat as, wa mir ënnert äis keng Eenegkeet hunn. Da si mer net méi dat Vollek vum Herrgott, dat Hien a seng Zukunft féiert, mee en traurege Grupp vu gëschter, deen e schappegt Bild ofgëtt, a wou et schwéier ass, eppes vun der Freed vum Evangelium ze spiren.

J

o, Ouschteren, an de Wee dohinner, deen iwwer Verzicht geet, wëll äis an eng déif Freed féieren.

Virun allem wëll ech dëst Joer jiddereen opfuerderen, fir an der Faaschtenzäit an den Evangelien ze liesen, fir all Dag eng Zäit vu Gebiet a vu Stëllt ze fannen.

Da kënne mer d’Freed vun Ouschteren net verpassen!

 

Jo, léif Schwësteren a Bridder,

et kann een äis villes huelen, mee net déi Hoffnung déi Freed, déi nëmmen den Herrgott ka ginn.

 

A grousser Verbonnenheet

Jean-Claude Hollerich

Äerzbëschof vu Lëtzebuerg

 

 

 
Service Kommunikatioun a Press . Service Communication et Presse
Äerzbistum Lëtzebuerg . Archevêché de Luxembourg

© Verschidde Rechter reservéiert . Certains droits réservés
Dateschutz . Protection des données
Ëmweltschutz . Protection de l'environnement