Séilege Marcel Callo

19. Abrëll

„Je sens à tout moment le Christ à mes côtés. Il est mon soutien et mon réconfort. Sans lui, je ne sais ce que je deviendrais.“
Dëst Zitat staamt vum séilege Marcel Callo, deem säi Gedenkdag de 19. Abrëll gefeiert gëtt.

Als zweet vun néng Kanner, koum hien de 6. Dezember 1921 zu Rennes op d’Welt a wiisst an enger ganz reliéiser Famill op. Engagéiert bei de Massendénger a bei de Scouten, ass hien och ganz fréi der Beweegung „La Croisade eucharistique“ bäigetratt, déi him d’Léift zur Eucharistie fir säi ganz Liewen apräge sollt.

Mat 14 Joer huet hien seng Léier als Typographen ugefaangen an huet d’Aarbechterwelt kenne geléiert. An där Zäit – vu sengem missionaresche Glawe gedrängt – gouf hie Member vun der „Jeunesse ouvrière chrétienne“ (JOC), wou hien duerch seng grouss Féierungsqualitéiten séier zum Sektiounsleeder opgestigen ass a sech mat vollem Engage- ment fir d’Rechter vun den Aarbechter a fir d’Botschaft vu Léift a Solidaritéit agesat huet.

Am Mäerz 1943 – dräi Deeg nom Doud vu senger Schwëster Marie-Madeleine, Affer vun engem Bombardement – gouf de Marcel Callo vum „Service du travail obligatoire (STO)“ agezunn an op Zella-Mehlis an d’Thüringen deportéiert, wou hien an engem Rüstungsbetrieb schaffe sollt. Bei sengem Départ sot hien: „Je ne pars pas en travailleur, je pars en missionnaire.“
Säi missionarescht Wierke goung weider.
Zu Zella-Mehlis huet hie Komeroden fir de Gottesdéngscht versammelt a Kranker gefleegt a war Deel vun engem heemleche kathouleschen Aktiounsnetz, dat haaptsächlech aus jonke chrëschtleche Mataarbechter a Scouten zesummegesat war, wou hien Aufgaben iwwerholl huet, déi sech als geféierlech erwisen hunn.

Mat der Begrënnung, hie wier ze kathoulesch a géif géint de Nationalsozialismus agéieren, huet d’Gestapo de Marcel Callo de 19. Abrëll 1944 verhaft an an de Prisong op Gotha bruecht.
Vun do aus koum hien an d’KZ Flossenbürg an Hof, a schliisslech an d’KZ Mauthausen, wou hien am Ausselager Gusen II an der ënnerierdescher Fliger-Rüstungsindustrie huet misse schaffen.
Déi grouss Schikanen, déi minimal Verfleegung an déi katastrophal Aarbechts- an Haftbedingungen hunn derzou gefouert, datt seng Gesondheet extrem gelidden huet.
Esou koum hien op Mauthausen an d’KZ-Sanitéitslager a stierft – kuerz virum Enn vum Krich – de 19. Mäerz 1945 am Alter vun nëmmen 23 Joer.

Als „Märtyrer vun der Aarbechterjugend“ huet de Poopst Jean-Paul II. de Marcel Callo de 4. Oktober 1987 zu Roum séileg gesprach a säi Gedenkdag op den 19. Abrëll, den Dag vu senger Verhaftung duerch d’Gestapo, festgeluecht.

Séilege Marcel Callo, biet fir eis Jugendlech, a fir äis all.

(Text: J.-P. REINERS)

Zeréck op "Den Hellege vum Mount ..."

 
Service Kommunikatioun a Press . Service Communication et Presse
Äerzbistum Lëtzebuerg . Archevêché de Luxembourg

© Verschidde Rechter reservéiert . Certains droits réservés
Dateschutz . Protection des données
Ëmweltschutz . Protection de l'environnement