• Geschichtsfrënn vun der Gemeng Miersch
• Homepage vun Taizé
• Lëtzebuerger Massendénger

Priisterwei vum Jakob Zeilinger

De 27.Abrëll gëtt de Jakob Zeilinger um 9h30 an der Kathedral zum Priister geweit. Jiddereen ass häerzlech agelueden fir un dëser Feier deelzehuelen. Mir feieren d’Primiz vum Jakob an eiser Par den 9. Juni. Weider Informatiounen zu dëser Feier kommen zu engem spéideren Datum.
Hei ënnendrënner fannt Dir e puer Iwwerleeungen vum Jakob bei Geleeënheet vu senger Priisterwei

Eng nei Hoffnung
Ech ginn de 27. Abrëll zum Priester geweit. E neien Ofschnëtt vum Liewen fänkt elo fir mech un. Mee ech hoffen, datt dës Feier net nëmme fir mech, mä och fir Iech all eng grouss Freed wäert ginn.
Mee firwat ass meng Ordinatioun esou wichteg fir eis Por?
Et ass net well ech sou talentéiert oder sympathesch wier. Awer ganz de Géigendeel. Datt Gott mat mir baarmhäerzeg ass well ech oft keng perfekt Persoun sinn, erënnert eis all, datt Gott e Plang fir jiddereen vun eis huet, onofhängeg vun eise Schwächten.
De Numm Jakob gëtt am Alen Testament ëmmer dann als Synonym fir d’Vollek Israel benotzt, wann et drëm geet d’Vollek z’erënneren, datt et net wéinst senger Kraaft oder Gerechtegkeet erwielt gouf, mee nëmmen wéinst dem Herrgott senger Gnod.
Ech kann Iech versécheren, datt och ech aus Gnod zum Priester geweit ginn, an net well ech et duerch meng gutt Doten verdéngt hätt.
Datt Gott nach ëmmer Jonker zum Priester rifft, weist eis och, datt hien senger Kierch ëmmer gëtt, wat si braucht. Well dës Gnod, dëse Kaddo vun der Weih, kréien ech net nëmmen fir mech, mee fir Iech, well ech ginn Priester net nëmmen fir mech, mee virun allem fir Iech.
Natierlech stellt sech do direkt d’Fro: Wéi laang bleifs du dann nach bei eis?
Ech mengen ech wäert sécher nach eng gutt Zäit bei Iech bleiwen.
Mä och wann de Bëschof mech dann an eng aner Por schécke wäerd, ass et kloer, datt an eisem klenge Bistum all zousätzleche Paschtouer indirekt eiser Por zu gutt kënnt.
Kee vun eis weess genau wéi d’Kierch vun der Zukunft ausgesäit.
Si ass sécher anescht wéi jiddereen vun eis se sech virstellt. Awer wann jidderee vun eis säin Deel mécht fir datt d’Gemeinschaft net verluer geet, sinn eis Kierchen a 50 Joer nach ëmmer en Heem, eng Plaz, wou ee Gott begéine kann.
Dat ass eng vun den Haaptaufgaben vum Paschtouer, an eise Kardinol hält net op, eis drun z’erënneren, wéi wichteg et ass, datt Gemeinschaften entstinn an an eise Paren erhale bleiwen, mee ech kann dat natierlech net eleng maachen, wéi de Konzil och zu de Paschtéier seet:
Mit allen nämlich, die wiedergeboren sind im Quell der Taufe, sind die Priester Brüder unter Brüdern, da sie ja Glieder ein und desselben Leibes Christi sind, dessen Auferbauung allen anvertraut ist. (…) Sie müssen mit den gläubigen Laien zusammenarbeiten und in deren Mitte dem Beispiel des Meisters nachleben, der zu den Menschen “nicht kam, sich bedienen zu lassen, sondern zu dienen und sein Leben hinzugeben als Lösepreis für viele” (Mt 20,28). Die Priester sollen die Würde der Laien und die bestimmte Funktion, die den Laien für die Sendung der Kirche zukommt, wahrhaft anerkennen und fördern. (Presbyterorum ordinis 9)
Verschidde Leit soen: De Priester ass de Kapp vun der Gemeinschaft.
Awer tatsächlech ass de Kapp vun der Kierch Christus.
De Paschtouer ass méi wéi den Hals, oder d’Wirbelsäil, dei probéiert de Kierper zesummen ze halen. Mee wat wier eis Porgemeinschaft ouni Hänn, ouni Féiss, ouni Häerz?
Dofir hoffen ech datt, besonnesch bei der Feier vu menger Primiz, net nëmmen ech am Fokus sinn, mä dass d’ganz Por sech ka freeën, datt mir zesumme Christus am selwechte Glawe nofollege kënnen.
Ech hu sécherlech nach vill ze léieren. An ech weess, datt ech op är Gedold zielen kann. Awer ech hoffen, datt och duerch mäin Déngscht, erëm eng frësch Loft duerch eis Por bléist, a mir all erëm “eng nei Hoffnung” fillen.
Jakob Zeilinger, Diakon

parbréif 3/24

Wat ass dat eigentlich “Sonntagschule”

Et ass net eigentlich eng “Schoulstonn”, mee eng Méiglechkeet fir iwwert eise Glawen nozedenken.
Déi nächst “Sonntagsschule” ass
Donneschdes, den 18.Abrëll 2024 um 19:30 Auer zu Miersch an der Kierch.
Thema ass LEED
De Viirtrag dauert ongeföier 45 Minutten a baséiert sech op d’Buch “Gott braucht dich nicht”-eine Bekehrung vun der Esther Maria Magnis.
Vläicht komme mir duerno an d’Gespréich, esou, dass Dir Iech eventuell 1,5 Stonne reservéiere misst

Vill weider Informatiounen a Gottesdéngschter fannt Dir am Parblat.