Kirche

An de Bicher vun dem Franziskanerklouschter vu Bouneweg fanne mir den Numm „Koplescht“ fir d’éischt am Joer 1296 ënnert der Bezeechnung „Granges de Copstal“. D’Historiker si sech eens, datt Koplescht deemols schonn eng Kierch/Kapell hat; sie stung op der Kräizgas um Rand vum Bësch an um Fouss vun de Fielsen, do wou déi meescht vun de Leit och gewunnt hunn.

Vu kierchlecher Säit war Koplescht an zwee gespléckt: riets vun der Mamer zesumme mat de Briddeler Häff huet zur Por Steesel gehéiert. Op der lénker Säit zur Por Kielen. Nëmmen op Niklosdag ass eng Mass an der Kapell op der Kräizgas gehale ginn. D’Kapell war dem hl. Niklos geweiht. Am Joër 1712 waren déi 2 Porhären d’accord, datt déi kopleschter Leit e sou genannte „Frühmessner“ kréien därfen. Dien hat d’Erlabnis, um Sonndeg eng Mass ze halen; an der Woch war e chargéiert fir de Kanner Unterrecht ze ginn an hinnen Schreiwen a Liese bäizebréngen. D’Awunnerzuel huet déi Zäit ëm 250 bis 400 geschwankt. Bis 1765 hat Koplescht 5 „Frühmessner“.

Déi Kopleschter mat den Hafleit vum Briddel hu bäi dem Kurbëschof vun Tréier am Joer 1765 ëm Erlabnis gefrot, fir an hirer Kapell Gottesdéngschter därfen ze halen. D’Bestriewungen no Eegestännegkeet hunn de 25. Mee am selweschte Joer Friischte gedroen a sie hunn déi gewënschten Erlabnis kritt. Sie hunn och e Kierfecht duerfe bäi hirer Kapell uleeën a kruten e Kaploun, deen ënnert dem Porhär vu Steesel stung. De Paschtouer vu Steesel hat eleng d’Recht, Leit ze bestueden. Bis an d’Joer 1805 hat Koplescht 4 Kapléin.
Enn 1805 gouf duerch d’napoleonescht Koncordat Koplescht zu enger eegestänneger Por erhuewen an ass zum Dekanat Lëtzebuerg-Norde gerechent ginn. Den 28. Januar 1806 huet Koplescht den 1. Paschtouer kritt. Et war den Här Gregor Bolts. D’Kapell, déi 9x5,5 m hat, war ze kleng an esou ass et nëmmen normal, dat eng gréisser Kierch dem Paschtouer seng Haaptsuerg war.

1838 ass den Neibau vun enger Kierch geneemegt ginn a schon am Joer 1839 gouf op Niklosdag déi éischt Mass dra gefeiert. Et huet awer bis de 7. Juni 1864 gedauert, ier se feierlech konsekréiert ginn ass. Ursaach war, datt e groussen Deel vun den Aarbechten wéint der grousser Iwwerverschëldung net éischter färdeg gemaach gi sinn.
Ganz opwänneg Reparaturen hunn am Joer 1926 un de Fëllementer vun dem Bau misse gemaach ginn (400 000 fr.). Et bestung d’Gefor, datt d’Kierch soss kënnt zesummefalen. D’Kierch huet dunn och 2 nei Klake kritt, eng nei Sakristei an eng Waarmloftheizung. Och en neie Kierfecht gouf ugeluecht.

1937 ass den Duksall fir d’drëtte Kéier vergréissert ginn; de Chouer gouf vum A. Bové gemoolt an déi heiteg Uergel (G. Haupt) koum an d’Kierch.
1940 huet Koplescht 800 Awunner an de Briddel 300. Duerch d’Sprengung vun der Bréck den 10. September 1944 waren d’Fënsteren total zerstéiert ginn; déi heiteg faarweg Fënsteren sinn aus dem Joer 1950.
1965 ginn nei elektrifizéiert Klaken ugeschaf, déi mat hirem Schlag och d’Auer uginn. De Chouer gëtt 1971 den neie Bestëmmunge vum II. Vatikanesche Konzil ugepasst. D’Uergel huet missen 1987 restauréiert ginn.
Vun 1806 un zielt Koplescht 20 Paschtéier. Iwwert d’Grenze vum Duerf eraus bekannt sinn:

de Victor Weis (1916-1923): hien ass den Autor vum Kopleschter Lidd.
de Wëllem Weis (1932-1936) ass bekannt als Schrëftsteller
den Henri Blackes (1954-1965) : Geschichts-a Vergaangenheetsfuerscher.

Jean Muller, Koplescht

Permalink: https://web.cathol.lu/article982